政情：肥彭又回魂 冇干預港務 搵鬼信
香港回歸即將踏入二十一年，末代港督彭定康（肥彭）陰魂不散，不時回魂對香港事務指指點點，尋日又再撰文批評香港政府。話說參與前年農曆年旺角暴亂嘅本土民主前線前發言人梁天琦，早前因一項暴動罪成被判囚六年，肥彭當時隨即話暴動罪所涉及《公安條例》嘅字眼定義模糊，令條例被人濫用，如被用作政治用途，針對泛民同社運人士做極端判決，引起中國外交部同港府批評。本來事件已告一段落，點知肥彭冇收聲不特止，仲要撰文死撐話唔係針對梁天琦嘅判刑，只係單純講《公安條例》，意圖自圓其說。
話說「雙學三子」黃之鋒、羅冠聰同周永康因四年前違法佔中期間衝擊政府總部東翼前地而被判囚後，肥彭又指指點點，話判三子入獄係港府最大嘅錯誤，令人質疑香港嘅自由同多元文化進一步惡化，當時已經被外界炮轟干預香港事務，攻擊法官，點知喺梁天琦被判囚後，佢又再指指點點，仲畀中國外交部同港府批評，外交部講明堅決反對任何外部勢力干預香港事務同特區司法。
對香港法治指手畫腳
碰到一臉子灰，肥彭尋日撰文自圓其說，話自己喺黃之鋒案中，唔係攻擊法官，而係批評時任律政司司長袁國強作出不明智嘅政治決定，而喺梁天琦案亦唔係批評法官嘅裁決，而係批評《公安條例》嘅存在，違反《公民權利和政治權利國際公約》，仲叫港府解釋點解唔遵守聯合國公約。
跟住佢又話好關注《公安條例》部分條文，特別係「擾亂公眾秩序」同「非法集結」等部分，而近年示威者嘅逮捕同起訴數量增加，同示威期間警察會錄影等都係值得關注嘅問題。其實香港都回歸將近二十一年，佢到依家仲喺度指手畫腳，話唔係想干預香港事務都冇人信啦！
指指點點都不特止，肥彭仲暗批話港府教人法治之前，應該先回應一下跨境執法咁話，唔通佢發緊夢，以為香港仲係佢管緊，講兩句就跟晒佢去做？其實，係佢自知頭上政治光環已消失殆盡，又不甘寂寞，想借對香港事務說三道四，不斷抽油水嚟增加曝光率就真。