中環出更：記錯會面日子 陸頌雄教局口同鼻拗

陸頌雄話原定前日下午五點半，安排多名社工同教育局官員包括副秘書長會面，以反映「一校一社工」對社工嘅影響。佢話官員通常都會早到，但前日到會面嘅時間都未見影後，即打電話但冇人接聽，所以轉為聯絡教育局政治助理施俊輝，之後先得悉局方記錯會議日期為尋日。

佢更透露，相關嘅記者會早喺一個月前召開，經三催四請後先同局方安排到會面，但最終來自全港各區嘅社工，收工後趕赴立法會卻撲空，直言令人失望同憤怒，而呢班社工更質疑局方無正視問題同尊重專業。佢希望局方能夠喺七日內，安排到佢哋同教育局局長楊潤雄會面，直接聆聽社工訴求，又警告局方唔好閉門造車，否則或會好心做壞事。

教局指再安排會面

但教育局就回覆話相信事件出於誤會，根據局方電郵紀錄，雙方擬定嘅會面日期同時間都係尋日下晝五時三十分，地點係立法會其中一個會議室，從來冇改變過，亦唔存在局方甩轆之說，又話樂意聆聽業界嘅唔同意見，仲會安排再次會面添！

卓妮