中環出更：關注基層精神健康 羅台秦搞大笑瑜伽班
香港人壓力大，精神健康問題愈嚟愈引人關切。一直關注弱勢社群嘅仁愛堂來年將推出新嘅服務，整合旗下醫療、社會、教育及康體服務等資源，為有輕度抑鬱症狀人士及照顧者提供支援。仁愛堂主席羅台秦（Louisa）話具體服務內容多多，例如搞大笑瑜伽班、提供社區保母等，期望藉此引起社會齊關注。
一眾董事局成員尋日齊現身仁愛堂全年大型節目巡禮午宴，預告未來一年各項慈善工作。前主席鄧錦雄、總理黃曉妮、黃紅曉、陳映彤同許友堅（Maverick）等人都有出席。
許友堅自有一套凍齡術
其中Louisa對精神健康服務最着緊，佢話舊年香港每一百名成年人之中，有三人患有抑鬱症，而且半數患者都冇求助，嚴重嘅個案或會引致自殺、他殺或倫常慘劇，長期承受壓力嘅照顧者亦好需要幫助，因為若佢哋壓力未能緩解，都可能造成好嚴重嘅後果。
今屆仁愛堂好多後生總理，做美容業嘅Maverick係其中之一，驟眼望落以為佢只得廿幾歲，其實畢業經已廿年。保養得咁好，秘訣係用自己調製嘅護膚品，因為佢致力鑽研DNA科學護膚，自有一套「凍齡術」啦！
黃曉妮就係護齒專家，事關佢喺老公嘅牙科醫療集團幫手。卓妮見佢牙齒齊整亮白，唔知有乜貼士畀鍾意飲咖啡、紅酒，但係又恨有一口雪白靚牙嘅市民呢？靚女笑笑口話：「用飲筒啦！」不過環保潮流興走塑膠飲管，所以記得買可自然分解嘅飲筒吖！
卓妮