一個人衰起上嚟，行路都會打倒褪，飲水都會塞大牙。好似啟德郵輪碼頭咁吖，設施天殘地缺，管理七國咁亂，淨係開條接駁巴士線啫，都有本事甩轆鬧笑話，真係唔到你唔服！
話說城巴日前開通來往啟德郵輪碼頭至九龍塘又一城嘅新巴士路線，唔少巴士迷專程搭車捧場，點知架車朝頭早六點半駛到去碼頭門口，隨即被保安人員以「未開門」為由拒之門外，成班乘客要喺碼頭外面落車；咁都未算，去到尾班車由九龍塘開到去碼頭，又因為過咗營業時間不得其門而入，啲乘客就係咁畀佢哋玩到陀陀擰。
運輸署解畫，話審核路線時已經同巴士公司以及碼頭方面溝通，亦考慮到碼頭嘅開放時間，既然係咁，又點會犯咁低級嘅錯誤呢？如果有旅客睇到呢一幕，乜嘢印象分都扣清光喇！講開又講，郵輪碼頭交通配套設施不嬲差到冇朋友，幾年前碼頭啱啱開幕，成功吸引到世界最大郵輪之一嘅「瑪麗皇后二號」光臨，以為總算威番一次喇，點知旅客一落船，淨係等的士都等咗幾粒鐘，搞到香港醜出國際。
眨吓眼五年過去，可惜情況唔單止冇改善，反而仲愈來愈差。早幾個月之嘛，有參加本地郵輪遊嘅旅客，因為碼頭泊位畀國際級郵輪霸咗，被迫要坐駁艇上船，本來已經夠氣頂，點知旅遊巴唔夠要等，上到車又要等開車，結果前前後後唔見四、五粒鐘，你話唔就假嘅！
郵輪碼頭門可羅雀，店舖十室九空，好大原因就係交通唔就腳，啲客覺得隔涉自然唔願去，接駁交通冇客更加做唔住，形成惡性循環。之前來往觀塘至郵輪碼頭嘅街渡服務，就係因為長期得小貓三、四隻幫襯，結果好快就摺埋。
最好笑嘅係，財爺波叔前排喺網誌敲鑼打鼓，話當局會改善郵輪碼頭交通接駁，其中就包括上述城巴路線，點知佢老哥拍拍心口扑槌就關人個關，結果咪搞成咁囉。呢嗱，波叔前任鬍鬚曾都係一擔擔o架，係威係勢搞咗個「美食車」出嚟就拍拍籮柚，之後商戶吊鹽水又好，嗌救命都好，佢老哥飲紅酒睇法國電影，冇你咁好氣，曾、波合稱「史上最廢財爺」，實至名歸，旨意佢兩位做香港大掌櫃，市民都係自求多福好過。
講番啟德郵輪碼頭呢筆，交通不便其實只係管理不善嘅冰山一角，泊位不足，食肆又少，每逢打風落雨就淪為水簾洞，甚至環境衞生都衰過人，搞到老鼠仲多過旅客，連審計署都忍唔住鬧爆。難為港府仲話發展郵輪經濟，家陣連一條巴士線都未搞得掂，未學行先學跑，盞笑大人個口嘅咋！