政情：毛孟靜拉布 拎錯文件𤓓爆
立法會工務小組委員會為拉布重災區，為咗解決拉布問題，過往已不時加會解決審批工程緩慢嘅問題，尋日就加開四小時會議。但係人稱「毛婆」嘅立法會議員毛孟靜喺會上又拉布，但就拎錯其他會議嘅文件發問，認真𤓓爆！
會議審議同機場第三條跑道系統相關嘅三項設施工程，毛婆就大問文件上「香港飛行情報區」點解，仲話「空域就空域」喇！主席盧偉國就話似乎無收過呢份文件，質疑係咪其他會議嘅文件。毛婆如夢初醒，死死吓話確實係工商事務委員會文件。但盧偉國見有民航處官員在席，就容許佢解答，話呢個係民航專用術語，由國際民航組織將各地空域分畀唔同地區提供導航服務，而呢個區就係由民航處所負責喇。
被點醒仲死撐鬧人
不過鬧劇仲未完，事關毛婆隔咗一陣又再發言，話自己又搞錯咗，文件應為經濟發展事務委員會，但文件同現時嘅議題一模一樣咁話，不滿盧偉國話唔處理其他會議文件，又鬧點解唔准問喎！毛婆今鋪真係死雞撐飯蓋囉！