政情：中環出更：宗族太旺丁 陳鑑林大獎求孫女
中國人傳統觀念係鍾意男丁，不過立法會前議員陳鑑林（橄欖）就唔係咁諗，早前佢出席九龍社團聯會會慶時自爆恨抱孫女，事關佢有七個內、外孫，但係全部都係仔。橄欖聲稱邊個生個孫女畀佢玩，就會有大獎。至於大獎係乜？佢話要賣個關子喎！
七個孫全部都係仔，咁旺丁，自然要問吓橄欖嘅家族史。佢話自己有六兄弟同一個妹，而佢就生咗兩仔一女，睇嚟佢屋企都係仔多過女嘞。橄欖話，仔又好，女又好，一樣咁開心，但係女仔好似窩心啲，所以都好恨有個孫女。依家七個孫仔之中，最細得五個月大，有時啲孫都會爭嘢玩，所以佢會買多件玩具等佢哋唔使爭。
講起屋企人，出席同一個活動嘅中華總商會副會長李應生就話，原本打算下個月全家人一齊去日本大阪玩，點知早幾日大阪地震，為咗安全起見，依家都要改旅行地點啦。好彩只係訂咗機票，仲未出票，加上啲孫係讀國際學校，早啲放暑假，機位冇咁緊張，所以都唔係太煩惱嘅！
陳穎欣搵男友要夠大隻
同場仲有立法會議員馬逢國、深水埗區議員陳穎欣同埋觀塘區議員鄭強峰，陳穎欣同鄭強峰當晚仲拍住做司儀。陳穎欣笑笑口話，搵男朋友最緊要似鄭強峰一樣，「有膊頭」兼夠大隻，而佢本身都有做運動，所以第時都唔想男朋友太瘦。雖然講擇偶條件講得咁開心，但其實家人都冇催佢拍拖，隨得佢忙吓做地區工作先喎！
卓妮