政情：增侍產假拖多半年 羅致光 張超雄互片
增加男士侍產假可謂打工仔福音，唔少準爸爸都引頸以待。不過一條咁簡單嘅法案，可能要搞到出年農曆新年假先可以生效喇！事關勞工及福利局局長羅致光同工黨立法會議員張超雄傾唔掂數，羅致光尋日（24日）喺網誌上自認失敗，因為佢說服唔到議員唔成立法案委員會，結果令到「狗年BB」爸爸冇得放多兩日。不過網誌一出就隨即引起隔空罵戰，主張成立法案委員會嘅張超雄反鬧羅致光，既然咁緊張，想「狗年BB」爸爸都受惠，點解唔早啲拎上嚟立法會呢？
立法會上星期三（20日）已就政府由三日侍產假增至五日嘅法案進行首讀同二讀，之後仲要幾多時間先完成立法程序，就係個謎。羅致光本來打算喺立法會暑假休會前搞掂，即係如果冇議員要求成立法案委員會，順利二讀、三讀嘅話，最快可以喺七月十一日生效。
張超雄堅持要加到7日
但係張超雄要求將侍產假增至七日，仲喺內務委員會提出成立法案委員會。張超雄尋日重申，五日雖然係勞工顧問委員會勞資雙方嘅共識，但佢身為立法會議員應該代表市民出聲，唔應該「袋住先」，所以堅持要七日。其實議員就政府法案叫價都正常嘅，衰就衰在羅致光晨早流流就話，政府只會接受五日方案，咁講法，梗係搞到議員條氣唔順。
當議員橡皮圖章惹反彈
羅致光都做過議員，應該知道一早就咁強硬講明只接受五日方案，擺明當議員係橡皮圖章，實會有啲議員反彈同拉布。雖然尋日佢都話唔應該「賴」議員，因為議員有權成立法案委員會，姑勿論侍產假有冇可能增至七日，至少依家搞到五日方案都未有，最少都要推遲半年先可以生效。
羅致光見如意算盤敲唔響，咪喺網誌上賣口乖，同「狗年BB」爸爸道歉，仲話「豬年BB」爸爸先可以受惠。好似下詔罪己，其實都係做戲，無補於事囉！