中環出更：蔣麗芸以為龍王丸係一粒丸

立法會議員蔣麗芸（Ann）尋日訪問食物及衞生局政治助理鄭守崗，講到鄭嘅小學年代係靠「龍王丸」去打開與同學仔嘅溝通之門，阿Ann即刻問「龍王丸」係咪一粒丸嚟o架？鄭守崗即刻解釋：「係機械人嚟」。認真搞笑！

鄭守崗係獨子，自細媽媽管教好嚴，佢冇得落街踢波，經常匿埋喺房，做完功課就同個公仔講嘢，自問自答咁，於是就掌握咗腹語嘅技巧。當然未達到表演級，但都係一個幾好嘅解悶方法。

講講吓，佢攞咗盒嘢出嚟，話呢個係小學時好受歡迎嘅玩具，就係「龍王丸」，《魔神英雄傳》卡通片裏面一個好重要嘅人物，依家啲人成日講：「機會嚟喇！飛雲」，飛雲就係駕駛龍王丸嘅角色。鄭守崗話有一年暑假播呢套卡通片，佢迷上咗，返到學校就同啲同學打開咗話題，所以對佢嚟講好有意義。

又難怪阿Ann唔知嘅，今年已經係《魔神英雄傳》播出三十周年，九十年代喺香港播放，依家變咗集體回憶，當時阿Ann喺商場上搏殺緊，點會留意呢？

卓妮