開講有話︰「搵食最緊要知碇。」廣東汕尾法院日前公開宣判十宗涉及毒品犯罪嘅案件，十名被告被判死刑後，跟手押赴刑場打靶。毒犯害人全家，固然死不足惜，之不過如果佢哋識得行遠啲，過隔籬香港或者澳門搵食，唔單止可以執番條命，仲分分鐘可以印印腳歎世界！
唔係講笑o架！大家睇吓汕尾呢十名毒梟被控嘅罪狀，其中一條係購買製毒原料，並將提煉出嚟嘅兩桶麻黃素，以每桶一百一十萬元人民幣嘅價格賣出，結果咁就「啪」得；再睇吓香港警方早前檢獲重達一百公斤、市值約一億元嘅毒品，話就話重挫黑幫和勝和前坐館泰國大毒梟「上海仔」郭永鴻嘅販毒集團，但由於拘捕嘅只係小角色，結果只需要坐二、三十碌，同人唔同命，內地「行家」唔恨得咁多！
大家有眼見，內地呢輪大張旗鼓掃黑除惡，屢破大案要案，雷聲大雨點更大，對黑惡分子大小毒梟產生極大震懾作用。反觀香港澳門，明明身兼公安部長嘅國務委員趙克志已經親自南下深圳督師，點知兩地警方一樣當耳邊風，連交數做戲都懶過人。好似香港警方咁，執支棒球棍就當係搗毀武器庫；搜到三幾千銀就當係冚咗大賭檔；甚至試過破獲二點幾克咁大把毒品，都敲鑼打鼓炫耀「戰績」，唔到你唔服。
咁就唔怪得香港班黑幫咁老定，有大佬輩公然喺西貢做壽，仲同仇家當街當巷飛車互片，明剃差佬眼眉，警方一年一度嘅所謂「雷霆」行動何止雷大雨小，直頭風平浪靜，「雷停」就差唔多。梳打埠亦係一擔擔，警方好多時都係拉埋晒啲魚毛蝦仔，同走過場冇乜分別。
聽吓全國掃黑除惡辦公室主任點講，佢話當務之急係集中處理涉及腐敗嘅涉黑涉惡案件，並同查處保護傘一齊進行。國產官僚講得出做得到，隨着多省官員倒台，黑惡勢力自然惡唔出樣。香港就唔同嘞，點解「上海仔」次次都可以趕喺警方郁手之前聞風而遁；點解條友涉案纍纍，拖延多年遲遲未被起訴？有人話「上海仔」有警方同司法兩重保護傘照住，絕對唔係空穴來風。
最近接連有京官要求中港兩地加強司法合作，包括商討引渡疑犯安排，講開引渡疑犯，功夫茶不期然諗起一套講述上世紀八、九十年代哥倫比亞大毒梟嘅美劇，男主角天不怕地不怕，把炮到受靶都可以「自己獄卒自己請」，就係最怕被引渡到美國踎監。估唔到今時今日掃黑除惡，一國認真為民除害，兩制做騷避重就輕，呢一幕居然喺現實重演。