政情：陳志全自爆討厭長毛 行過會擰歪面
立法會議員陳志全（慢必）為議會中嘅激進派，以往與社民連梁國雄（長毛）合作無間，但佢尋日就自爆，十年前見到社民連擺街站時，竟然行過會擰歪面，仲話覺得長毛煩厭添！慢必尋日出席論壇，同一班學生大談行政立法關係，雖然喺論壇上自揭曾經討厭長毛，但就話現時就肯定激進嘅手法，因為議會中欠缺民主成分喎，即係要行長毛條舊路。
依家肯定激進派價值
慢必重申激進派有存在嘅價值，因為可以增加政府管治成本同建制派嘅保皇成本，等佢哋無法咁舒服，最低限度都可以減少壞事通過數量。佢又為「拉布」辯護，不滿問得耐同問得多都被人話「拉布」、打仗，認為議員就好似手執夾萬鎖匙，所以擁有夾萬嘅政府仍然要向議會攞錢，而議員就要透過發問去守住鎖匙喎。不過，拉布會令工程成本上升，唔知市民又滿唔滿意佢嘅做法呢？