政情：林定國年紀大唔撞得 驚死怕踢波
四年一度嘅世界盃吸引到唔少球迷日日捱夜睇波，大律師公會前主席林定國（Paul）都係其中一員。不過，阿Paul就唔係場場賽事都睇，事關凌晨兩點場次太夜，佢話自己年紀大，開始出現睇睇吓就瞌眼瞓嘅情況。佢仲話，因為自己「咁鬼肥」，所以都想做運動，但踢波就咪搞佢，事關年紀大唔撞得，仲講明驚死添，所以都係行山跑步算喇。
睇世界盃感受唔同國家民族性
阿Paul好熟世界盃，一講起就眉飛色舞，話以前鍾意嘅荷蘭入唔到圍，但就無阻佢睇世界盃嘅興致，明言享受球賽嘅過程而非結果，亦都可以喺比賽中感受到唔同國家嘅民族性。佢更大讚冰島，認為該國人口少，而且部分球員只係兼職，但表現完全唔失禮，所以可以參考吓其訓練模式喎。