政情：離科技園 唔認不和 羅范「暗寸」楊偉雄
身兼行政會議成員嘅科技園公司董事局主席羅范椒芬，其主席任期將於本月底屆滿，唔再續任。外界指佢不獲續任係因為同創新及科技局局長楊偉雄不咬弦，楊早前就公開形容同羅范嘅關係「和而不同」，暗示二人有分歧。離任在即，羅范尋日接受電台訪問時，冇直接否認同楊鬧不和，仲話自己係率直嘅人，自幼都係要向權勢講真話咁話，佢仲踩楊力推嘅智慧城市做得唔夠添！兩人有冇不和，真係唔使多講嘞。
羅范回顧過去五年喺科技園公司嘅工作，形容自己係「大義工」，仲要出錢出力，所以冇乜嘢遺憾，而佢在任時，科技園亦擺脫咗純地產項目形象，佢亦感覺得到認同，都好欣慰喎。不過，佢就多次暗示喺推行工作時遇到阻力，包括爭取喺科技園興建「創新斗室」，為年輕科學家提供住宿誘因，足足爭取咗三年先做到，仲要被人話佢「不務正業」。而科技園公司曾進行研究，並向政府提出一連串建議，政府內部都有意見。
講到科技政策，羅范就話政府提出要做智慧城市，但就做得唔夠，應該要快啲，又話自己成日爭取香港做智慧城市，甚至想將成個沙田做智慧生活區添，不過因為政府提出以九龍東作智慧城市試點，佢先至費事「辣埋去」喎。用得個「辣」字，聽到都感覺(興)合合，火藥味濃。至於政府成日話要吸引科技人才來港，佢就話最重要係「落地生根」，唔係用錢請「過客」，而係要培養自己嘅人先啱。
楊評價「和而不同」 每晚都反思
對於外界指羅范不獲續任係因為同楊不和，甚至有指楊曾要求特首「兩個揀一個」，所以要犧牲佢。羅范就話自細都要向權勢講真話，對事不對人，認為意見唔同冇問題，直言「我畀你說服到，我跟你行」。佢又聲稱聽到楊講「和而不同」呢四個字後每晚都反思，唔覺得有大膽違背楊要佢做嘅事，佢希望所有人都可以坦率交往，「有咩不滿講我聽」，「如果講得唔啱、傷咗自尊心，講我聽」，佢唔會記仇喎。
從政逾40年 發覺唔啱做政客
羅范又喺訪問中話，自己說話比較率直，唔適合做政客。羅范早喺七十年代已加入政府，曾擔任多個要職，從政四十幾年，到依家六十五歲嘅退休年齡先至話自己唔適合做政客，會唔會後知後覺咗啲呢？