中環出更：杜振源戴帽獲讚 愈買愈多 收埋40頂
貪靚唔係女士專利，男士扮起靚嚟都可以好認真。香港小母牛籌款委員會主席杜振源（Simon）最近就鍾意咗戴帽出街，早前卓妮見佢戴住一頂黑色紳士帽出席慈善晚宴，顯得有型有款，有人一見到佢就讚不絕口，唔通係Simon新造型？
Simon笑笑口話，最近確實經常戴帽，出門前都會襯吓衫，所以就愈買愈多。好似幾個月前去一趟日本，見到好多帽子專賣店，款式多，設計亦好貼心，佢係咁買吓買吓，依家屋企已經有三、四十頂帽，布料由羊毛、絨毛及冷帽不一而足。依家天時熱，戴棉質帽就最涼爽喇。
楊建文密密競投拍賣品
一向係光頭look嘅政制及內地事務局前局長譚志源就笑稱好少戴帽，通常都係打高爾夫球時先戴吓。佢話十六、七年前就已飛光晒頭髮，自此就一直保持呢個造型。
喺當晚嘅慈善晚宴籌款活動上，好多善長都踴躍競投拍賣品以示支持，「手機屏幕大王」楊建文亦都密密舉手競投，唔知係咪因為要瞓身支持老友Simon呢？楊建文笑笑口話，一半係支持老友，一半係做善事。Simon就大讚楊係超級善長，一直大力支持佢哋，捐助金額幾乎年年攞第一名咁話。
心臟科專科醫生程偉傑當晚都在場。最近有機構特別提醒市民關注家族性高膽固醇，程就話確係有需要，平時見病人都有唔少錯誤觀念，例如坊間流傳導致高膽固醇嘅蛋黃唔怕食，似乎為蛋黃大平反，不過實情係食少少蛋黃至冇問題，因為膽固醇只有兩成來自食物，八成係人體自己製造。但如果一日食三、四個，變咗四成膽固醇來自食物，咁就大鑊喇。
卓妮