政情：下月赴法影婚照 林琳減肥零進展
結婚係人生大事，唔少女性都會喺婚前減肥，務求喺大婚時以最佳狀態示人，不過年尾出嫁嘅荃灣區議員林琳就有別一般嘅女性，事關下月遠赴南法影婚紗相嘅佢，至今仲未開始減肥囉！
話未婚夫偏肥 拍埋唔覺
林琳話婚紗特登買大啲，假如減肥成功可以改窄，減唔到肥又可以照着，似乎佢無乜減肥決心喎。不過，佢就話已相約朋友去做運動，同埋距離大日子仲有半年時間。而另一個令林琳放心嘅原因，就係佢未婚夫身形都偏肥，佢講笑話兩個拍埋一齊就唔會覺佢肥，至於婚紗相都可以靠執圖喇！
佢仲話特登趁下月有一個星期空檔就飛去南法影相，其他事宜好似度蜜月都仲未諗。不過今次南法之旅無得二人世界，因為佢同未婚夫都會帶埋媽媽同行。佢解釋，喺地區見唔少長者身體會突然變差，無法再去旅行而心情低落，所以自己都要把握機會帶媽媽去玩多啲。