中環出更：立會打緊仗 潘兆平得閒睇油畫
話說立法會尋日繼續審議具爭議性嘅《廣深港高鐵（一地兩檢）條例草案》，正當進入全體委員會表決修正案時，立法會勞工界議員潘兆平就一邊表決、一邊用會議廳內嘅電腦睇油畫？吓！打緊仗喎，佢仲咁有雅興？
潘兆平其後解釋，話當時較為空閒，所以就開電腦睇新聞，而佢所睇嘅係同明朝歷史人物鄭成功有關，除此之外亦會睇新聞中嘅相關連結。被問到點解係油畫時，佢就有啲支吾以對地話相關油畫或者係指鄭成功當年統領嘅帆船。
仲查閱鄺俊宇資料
跟住佢又話自己過去係用手機睇新聞，但由於手機屏幕較細，有時睇得比較辛苦，所以咪開電腦睇囉。以前佢都有用電腦瀏覽民主黨（白鴿黨）黃碧雲嘅資料，尋日佢就查閱該黨鄺俊宇嘅資料。
雖然鄺俊宇係今屆嘅新丁議員，但同潘兆平都做咗年幾同事，都未認識佢？潘兆平就解釋係認識鄺俊宇，而當時只係咁啱撳咗同鄺俊宇有關嘅連結啫，唔係特別留意佢。
卓妮