洋人有句說話係咁講嘅：「你不可能犯上兩次同樣嘅錯誤；因為犯第一次係錯誤，犯第二次已經係你嘅選擇。」用嚟形容香港郵政真係最貼切不過，因為唔理你點樣批評，郵政都係睬你都傻，重複犯錯，服務水平沒有最差，只有更差，問你服未！
呢，早排有市民幫襯香港郵政特快專遞，寄電子產品去智利，後來郵政話寄失咗，叫事主向保險索償，呢位苦主於是再使一大筆錢買過批貨寄畀客人，點知郵政失驚無神又話搵番失蹤郵包，雖然郵政肯退番全數郵費，仲懶偉大咁賠償一千五百蚊，不過已經玩到人陀陀擰，兼夾冇保險claim啦。
話時話，郵政嗰啲差到冇朋友嘅服務，早已喺市民心中留下烙印，佢哋啲蝦碌嘢多到數天光都數唔完，正如「東方報業民意調查」顯示，大部分受訪者認為郵政不負責任，服務低劣，甩甩漏漏數之不盡，對佢哋已經失晒信心，簡直係失信於民咁話。
講真，市民對郵政大派嬲嬲唔係冇道理嘅，就呢排之嘛，郵政因為搞錯派遞郵局，搞到唔少坪洲家長遲咗一日至收到小一註冊文件，耽誤咗家長去其他學校叩門嘅時機，你話郵政係咪冇好帶挈呀？唔止咁呀，有郵差開工好似夢遊咁，漏發領取掛號信通知卡，累到市民無法領件；舊年仲試過唔見咗至少三個裝滿郵件嘅郵袋，郵政竟然唔出聲博冇人知，你話吖，旨意郵政寄件喎，同將信件放入玻璃瓶漂出大海差唔多嘅咋。
唔使講乜吖，淨係睇郵政數簿年年見紅，就知佢哋管理有幾唔掂，就算舊年已經將目標回報率由百分之五點九勁縮到二點六，都係一樣唔達標。鬼咩，郵政唔係管理不善，直頭係冇管理，有郵差夠膽死加班踢毽呃超時補水津貼、九龍灣中央郵件中心又漏水又停電又老鼠橫行，無王管咁款，蝕錢仲係其次，服務甩漏累街坊先至最大鑊。
最諷刺嘅係，雖然郵政甩轆事件鑊鑊新鮮鑊鑊甘，審計署都力數過郵政十宗罪，批評佢哋管理郵局差劣，處理郵件求其，仲要濫發超時津貼、員工集體蛇王問題嚴重，不過理應責無旁貸嘅郵政官僚，不但唔使上身，近日仲升官發財，工作表現差仲有人工加，咁筍嘅工去邊度搵呀，唔怪得郵政話無意改變依家自負盈虧嘅現狀喇。
所以話，賞罰不明，國政不清。郵政自成一國，港府闊佬懶理，服務點會唔差吖？有人話港府不如收番郵政管理權，但計功夫茶話齋，港府官僚嘅表現咪又係同郵政官僚一擔擔，與其嘥心機捱眼瞓，不如執咗佢冇咁嬲！