街工大地震，搞到二十多人集體退會，仲要舉行記招數臭「無良僱主」梁耀忠。退會的街工會員直斥梁耀忠一人專政，有個資深會員指過去多次向梁查詢工作和支薪安排，對方卻拒絕正面回應，淨係話「月尾打簿咪知囉」。
之前梁耀忠話要「解散勞工組」，理由一時一樣，冇糧出又話「唔係解僱，鍾意可返嚟做義工」。你多年嚟都好正義凜然咁話要「爭取工人權益」，家陣卻做了本報「功夫茶」話齋嘅「梁無糧」，「街工」個招牌可以砸爛矣！以為跟你搵食，有汗水就有糧出，誰知要望天打卦，阿哥，做義工都有車馬費啦，家陣衰到水都冇啖飲，仲唔係無良僱主？既然財赤，不如索性執咗佢！
時間真係一面照妖鏡，一九九六年梁耀忠在立法局以「臭罌出臭草」形容首屆特首的四百人籌委、推委制度是「小圈子選舉」，被時任主席黃宏發指其言論侮辱議員，成為香港史上首位被逐出議事廳嘅議員，亦係殖民地立法局史上唯一的一位，咁都算「威」，假假哋都算締造了歷史。如今呢句嘢都算應驗番喺佢身上，被一眾退會會員直斥佢處事欠透明度，係一人專政，有如無良僱主！事隔二十二年，的而且確，臭草豈能扮香花？時間最老實，狐狸的尾巴始終要露出來，今後爭甚麼勞工權益！爭甚麼民主！唔該結束一人專政，咪再戀棧權位做一世無糧僱主！
後漢司馬徽有《誡子書》，短短三十多字：「聞汝充役，室如懸磬，何以自辨？論德則吾薄，說居則吾貧。勿以薄而志不壯，貧而行不高也。」司馬徽有「水鏡先生」之稱，可見其行事光明磊落而透明，他告誡兒子處世不是升官發財、爭取機會，怕他「志不壯，行不高」，指愈窮愈要有人格。今梁耀忠「財赤」，聲稱為勞工卻變成「無良僱主」，愈窮愈無人格，不是「臭罌出臭草」是甚麼？