政情：羅致光親身示範 要威一定要戴頭盔
「又要威又要戴頭盔」通常係暗寸人只求做事風光，但係又畏首畏尾，然而勞工及福利局局長羅致光尋日竟然親自示範畀大家睇「要威一定要戴頭盔」，唔通因為近期喺取消強積金對沖辣(興)班商界，最低工資檢討又惹起勞工界不滿，樣樣都唔知點收科，搞到IQ（智商）高達一百六十嘅佢都要自嘲？
提醒工友注意職安
其實羅致光唔係自嘲，而係推廣職業安全啫！佢喺網誌發表題為「『要威就一定要帶頭盔』 安全第一命長久」嘅文章，話按勞工處嘅工傷統計，由一三至一七年，裝修同維修行業共發生三十五宗致命工業意外，當中二十四宗，即約七成，屬於「人體從高處墮下」，包括喺工作期間從梯子跌下，令頭部受到嚴重撞擊嘅個案，情況令人擔憂。
佢話梯子嘅設計只供工友上落，梯級冇足夠企腳位，不利工作同保持平衡，兼且梯子冇圍欄，工友易失足墮下，構成傷亡風險，解決方法係採用輕便工作台同佩戴安全帽，佢仲粉墨登場，親身示範「戴定頭盔」拍照添！