政情：辣着何君堯 鬍鬚曾懵上心頭
前財政司司長曾俊華（鬍鬚曾）離開官場一段日子，真係無官一身輕，說話愈來愈火辣，近日仲「辣着」建制派議員何君堯。話說鬍鬚曾日前出席一個論壇時，口痕點評現時政壇，期間不點名批評何君堯早排喺一地兩檢法案委員會會議上，趁混亂期間用手機做直播，仲「做幼稚鬼臉」。何君堯隨即發貼還擊鬍鬚曾，反問「心黃盡露還是懵上心頭」，仲話慶幸鬍鬚曾做唔到特首，否則香港穩定繁榮就危危乎嘞。今次鬍鬚曾真係自己攞嚟衰喇！
曾攞嚟衰 指摘撥亂反正者幼稚
鬍鬚曾喺論壇上一開始懷念舊時光，話八、九十年代嘅議會，係紳士、淑女辯論同講道理嘅地方，大家都有底線，唔會打架、鬥大聲，更唔會開開吓會，開Facebook Live（直播），做啲好幼稚嘅鬼臉，搞到議會好似「Pre-School（學前）」嘅班房咁。
咁有挑釁性嘅言論，當然挑起何君堯嘅莫名火喇！佢前晚深夜撰文回應，話鬍鬚曾嘅言論好似批評香港有部分政客正在破壞香港制度與規矩，佢以為講緊涉搶手機嘅民主黨許智峯、衝擊立法會或擾亂議會嘅人民力量陳志全、濫用程序提中止待續動議嘅公民黨陳淑莊，甚或係濫用點算法定人數或企圖製造流會嘅人，點知原來係指摘佢。
何君堯話覺得與有榮焉兼受寵若驚，竟然喺鬍鬚曾眼裏，佢喺立法會內同記者一齊扮演第四公權，拍攝「泛統（泛民）」搗亂議會過程，向公眾揭示「泛統」醜態，就係幼稚行動，「心諗，如果他（曾俊華）不是誇張，就肯定是有問題了！」
此外，何君堯仲引用鬍鬚曾喺二○一五年審議預算案期間，發表題為「努力興建，盡情破壞，彼此也在捱」嘅網誌，意在指摘泛民拉布，何君堯批評當時鬍鬚曾指「泛統」議員係「盡情破壞」，今日就反而批評撥亂反正嘅人係破壞者。係鬍鬚曾變得糊塗，定係本質如此呢？