中環出更：踩單車先學炒車 吳宏斌讚運動員有毅力
香港雖然係彈丸之地，但人才絕對唔少，例如體育方面，近年都有唔少香港運動員屢創佳績。香港中華廠商聯合會（廠商會）會長吳宏斌（斌哥）早前應香港體育學院主席林大輝邀請，同廠商會一班手足到沙田體院參觀，以示支持香港運動員。期間眾人見到多名揚威國際嘅知名運動員出賽時嘅戰衣、戰車，仲爭相影相留念添！
斌哥喺社交網站放上多張相，其中包括一個展示櫃，櫃內有一套「牛下女車神」、女子單車運動員李慧詩嘅戰衣，隔籬仲有一對爛手套。斌哥話，聽教練講學踩單車之前要先學識炒車，因為一旦炒車，可以順勢打個觔斗去卸力。佢話見到個爛手套，都感受到運動員要承受好多痛楚，真係少啲毅力都唔得。
一齊去參觀嘅仲有廠商會副會長史立德、吳國安及會董施清咸等人，曾經係廠商會立法會代表嘅林大輝就全程招呼眾老友，仲安排猛人現身說法添！邊個人咁猛呢？就係十四年前喺雅典奧運會上，勇奪男子乒乓球雙打銀牌嘅「乒乓孖寶」之一嘅李靜喇！李靜退役後依家任職港隊教練，栽培下一代港隊精英。
吳國安對體院餐廳印象深刻
參觀體院設施及運動員訓練情況之外，一場嚟到，梗係要去餐廳「視察」吓喇！吳國安對餐廳嘅飯餸留下深刻印象，事關運動員要保持體能，唔可以食得太肥膩，所以餐廳啲食物冇咩油，但係都唔難食，其中清湯蘿蔔牛腩仲好好味添！
卓妮