美國前總統傑弗遜曾經講過，如果要喺政府同報紙之間揀一樣，佢會毫不猶豫咁選擇後者。冇錯喇，大家睇吓沙中線紅磡站鋼筋造假嗰單醜聞，運房局局長陳帆烚吓烚吓，話要到「睇新聞至知」，由此可見香港班高官係幾咁廢柴，而第四權又係幾咁緊要。
光頭局長就話唔知情吖，佢手下嘅路政署官僚視而不見，見而不理，就肯定吟詩都吟唔甩。據分判商所講，佢哋舊年已經發現工程有問題，並透過電郵同電話要求同運房局官員會面，後來獲總承建商「承諾」改善，於是通知局方問題已經解決。之後路政署官僚係咁意問吓港鐵，港鐵又係咁意將個波交畀分判商，hea多兩hea不了了之，結果咪搞出今日咁嘅大頭佛囉！
有人就講得啱嘞，鋼筋造假影響安全，人命關天，嚴重程度同當年公屋短樁有得揮，涉事者分分鐘監都有得坐，分判商同總承建商「私了」固然不該，路政署官僚當正自己出嚟行嘅蠱惑仔咁講個「信」字，闊佬懶理，關人個關，連派人落地盤check吓都嫌費事，同草菅人命冇咩分別嘅咋。
不過大家都見怪不怪咯。路政署官僚冇嘢叻，最叻就係臭屎密冚。早排審計署踢爆路政署喺八號幹線沙田段涉及管理失職等問題，該署向承建商批出其中一條高架橋道路合約，點知項目比原定計劃遲咗兩年，造價因此增加三億幾，路政署冇追究責任不特止，反而先斬後奏，動用兩億幾元公帑「掩口費」平息事件，擺明有景轟！
咁都未算呀，港珠澳大橋工程好事多磨，甩漏多過食飯，唔係人工島移位，就係防波堤有問題，路政署官僚次次都大派定心丸，結果係點大家有目共睹；又好似高鐵工程出現嚴重延誤超支咁，路政署等衙門開頭瞞得就瞞，瞞唔到就巧言令色，一時話對承辦商「疑中留情」，一時賴對承辦商「過分信任」，山草藥噏得就噏，誠信早就破產。
當然喇，弱將手下無強兵，光頭局長唔知係咪平時「靈魂游走」得多，主管嘅政策範疇冇樣掂，渾噩程度分分鐘拍得住當年周一鑊，唔出事至怪。不過大家同佢老哥定，事關政務司司長一早攬咗佢上身，拍心口保證光頭局長真係唔知情。咪畀人睇死，港府話就話唔排除成立獨立調查委員會徹查事件，到最後咪又係「刑不上大夫」，求其搵幾個前線祭旗就當交咗功課。
冇計喇，呢啲就係香港政治問責制嘅特色，高官無論賴幾大鑊嘢都好，只要面皮夠厚，一樣可以「坐以待幣」，旨意官老爺為基建工程安全把關喎，市民都係自求多福，戴鋼盔行騎樓底穩陣啲！