政情：譚志源 陳岳鵬做過官驚咗立會？
問責官員離開政府「熱廚房」後，轉換跑道參選立法會確實有優勢，好似新民黨主席葉劉淑儀就係成功例子。政制及內地事務局前局長譚志源（Raymond）尋日同前副局長陳岳鵬（Ronald）食早餐，半年冇見，Raymond「先發制人」問Ronald會唔會選立法會，對方答佢唔會，Raymond仲大笑形容「立法會唔適合我哋」。唔通做過官就怕咗立法會？
食飯傾吓前程
Ronald曾經係南區區議員，辭任區議員走入官場做特首辦特別助理，再做政制及內地事務局政治助理，其後升任副局長，政界不時傳出Ronald唔做官後，可能會去選立法會，但Ronald反而去咗外國讀書。Raymond話，上次見Ronald已經係去年聖誕節，今次再見覺得佢精神飽滿，皮膚又好咗，食飯都係同佢傾下一步點行，作為「老鬼」畀啲意見。睇嚟舊同事感情真係唔錯喎！