政情：發展局副局長用老婆名買樓 廖振新慳辣稅？

市民難買樓，土地單位供應又遠水不能救近火，政府近日連開徵新樓空置稅都諗埋，十足窮人思舊債。不過，負責覓地造地、職責同樓價息息相關嘅發展局副局長廖振新，似乎就唔信政府幫到樓市降溫喎，皆因佢喺上月四日喺其問責官員利益申報中，新增其擔任家庭主婦嘅老婆喺沙田區擁有一層自住單位。根據差餉物業估價署嘅數據，私人住宅售價指數已連升二十五個月創歷史新高，換言之，廖振新夫婦唔怕喺升浪中入市，即係對後市充滿信心啦！

根據廖振新去年八月上任時作出嘅利益申報，佢繼承咗廖父喺元朗嘅一間村屋同一片農地約一成七業權，而佢老婆原先只擁有內地東莞物業，所以今次佢用老婆而非自己名義去買，好大機會可以避開針對擁有多於一項物業而徵收樓價百分之十五嘅「從價印花稅」樓市辣招喇。官員喺呢個時候買樓，真係求神拜佛政府唔好之後再推出樓市加辣招，否則水洗都唔清，搞到成為今屆首名因偷步買樓而落台嘅副局長就唔好啦！

村屋農地遺產業權仍處理中

至於廖振新嘅村屋同農地業權曾經惹來囤地疑雲，佢其後表示屋同地係嚟自廖父嘅遺產，當完成手續後會避嫌將業權轉讓兄弟姐妹，但至今過咗九個月，利益申報仍然顯示佢擁有上述業權。廖振新回覆查詢時只係重新確認申報嘅內容，承認在四月底買樓，以及承認村屋同農地嘅遺產仍在處理中，情況未有轉變，就算以自己名義買樓，也不需付百分之十五嘅印花稅。

另外，有兩位問責官員都申報自己太太由家庭主婦變為再就業。創新及科技局副局長鍾偉強喺今年二月申報太太職業為數碼營銷行政工作，唔知同佢主責嘅創科政策有無利益衝突呢？至於政制及內地事務局局長聶德權亦喺去年十二月申報太太擔任行政工作，但就無交代係咩行業喇。