中環出更：想赴俄睇世盃同靚女 侯志強「眼看手勿動」
今屆世界盃即將開鑼，唔少球迷都熱切期待，甚至會飛去主辦國家俄羅斯現場睇，感受熱鬧氣氛，真係開心過隔住個螢光幕睇。上水鄉事委員會主席侯志強早前喺馬場講起，正考慮飛去俄羅斯睇波，睇波之餘，當然會睇埋俄羅斯靚女啦，最緊要嘅就係「眼看手勿動」！至於港九電器商聯會主席蒙德揚（David）就話，時間尚早，仲未決定係咪飛去當地睇喎。
俄羅斯被指治安麻麻，有啲球迷都因而卻步，侯志強就話唔使驚，因為佢多朋友喎，如果真係成行，就唔打算帶埋太太去睇嘞。佢話「去到唔通綁住對眼咩」，梗係睇靚女啦！聽佢講到咁大條道理，唔怕太太嬲咩？佢話太太唔會嬲，「都係睇吓之嘛」，最緊要係「眼看手勿動」喎。
蒙德揚冀亞洲隊有好成績
David都帶埋女兒Jocelyn去馬場，本身係球迷嘅David話，以往去過日本睇世界盃，今屆就仲未決定係咪去俄羅斯睇，最希望亞洲隊今年有好成績，如果南韓、日本打到入八強嘅話，佢已經好開心。講起仔女，佢話都係時候要將「蒙氏咖喱」傳畀啲小朋友喇，至於Jocelyn就話未學識，好難整，但就好鍾意食，而且愈辣愈好添，睇嚟真係有遺傳。
卓妮轉個頭又喺馬場見到香港僑界社團聯會主席陳有慶，佢去年因為細菌入腰，所以行路都要人扶住慢慢行，但今次見到佢喺馬場行得好快，完全唔使兒子陳智文扶住，陳智文話，爸爸休息得夠，所以好好多喎！
卓妮