街工欺負勞工 民主淪為淫主

聽講老千集團入面有所謂「千門八將」,為咗令人跌入騙局,佢哋分工精細,又軍師又睇水又打手咁。其實講到呃人,邊使咁勞師動眾,求其戙支「爭取工人權益」嘅旗出嚟都搞掂喇,好似街坊工友服務處梁耀忠咁,唔少曾經跟佢搵食嘅都話被佢呃得透呀。

呢,尋日就有二十幾個街工勞工組嘅前職員搞「兵變」,話要數臭無良僱主梁耀忠,搞到佢哋有汗出冇糧出。佢哋話喎,問親梁耀忠幾時出糧,點知佢老哥唔係耍賴皮話「到時打簿你就知」,就係睬你都有味,咁都唔止,勞工組仲被人抹黑添。忍無可忍,不必再忍,班苦主誓言要將「梁無糧」所做嘅「好事」公告天下,等啲街坊工友帶眼識人咁話。

梁耀忠平日開口埋口為勞工出頭,但講一套做一套,請班夥計食無情雞唔在講,仲要講埋啲不負責任嘅說話,話唔出糧「可以當做義工」喎。無良僱主見得多,梁耀忠能夠厚顏到一邊話要維護勞工權益,一邊帶頭剝削打工仔,有口話人冇口話自己,真係夠晒諷刺。「梁歪理」做到頭髮白晒,無良本質至嚟原形畢露,自己打爛自己招牌,可謂多年道行一朝喪咯。

講真,呢啲掛羊頭賣狗肉嘅情況,喺嗰班反對派身上相當普遍。臭罌出臭草吖嘛,佢哋最叻就係得把口講民主,到做起上嚟仲獨裁過佢哋口中嘅共產黨。好似九龍西補選咁,上次都話搞個初選制度,選出Plan B,懶民主咁款,到頭來都係假嘅;今次九西又要補選,直頭連戲都懶交,直接指定Plan B,搞到民協老將馮檢基要出走。喂,反對派當初反對政改方案,話「我要真普選」!依家自己就玩「欽定」備胎,點解唔見呢班人撲出嚟大嗌:「我要真補選!」鬼咩,成班反對派都係靠啄食漢奸黎狗餅生存嘅「飯民」,民主淪為「淫主」,即係又淫又賤嘅漢奸黎一個人作主。

講起漢奸黎,何止假民主、真獨裁吖,佢仲經常將捍衞新聞自由掛嘴邊,講到鬼咁好聽,實際上就帶頭打壓新聞自由,舊年六四維園,佢喺大庭廣眾之下粗口辱罵兼刑事恐嚇東方記者,就係鐵證。最慘係律政司姑息養奸,政治黑金案被放生,佔中案泥牛入海,恐嚇東方記者案又拖成年,仲話香港係法治社會喎,唔好當人係三歲細路哥喇。

睇到啦,無論係幫工人「發聲」嘅,定係口宣「民主」、「新聞自由」嘅,通通都係老千嘅化身,香港人要時刻記住唐唐嗰句金句「你呃人」,唔係蝕底咗至嚟後悔就遲啦。