政情：區諾軒請「煙腸」 包唔悶多福利
暑假臨近，立法會唔少議員及政黨都出廣告招人，希望更多年輕人投身社區。近日一則招聘廣告就引起廣泛討論，廣告聲稱議員辦事處內缺乏朝氣，需要年輕人將青春氣息帶畀「老餅議員」。議辦將確保「煙腸」（實習生）會有至少四項福利，包括唔會淨係印嘢碎紙、唔會覺得悶同千篇一律，仲有唔會見到「Old Sea Food（較為年長嘅職員）」。咁搞笑，原來係現年三十歲但容貌似四十歲嘅「老餅議員」區諾軒嘅搞作。
自稱議辦內最老
既然自稱係「老餅議員」，唔通佢係議辦內唯一嘅「Old Sea Food」？區諾軒冇正面回應，只稱自己係議辦內「最老」嘅人，最年輕嘅職員只得廿一歲。佢又口頭補充唔少福利，包括「女煙腸」可以同全職女員工睇齊，享有月事假，實習時間為期兩個月。至於聲稱工作唔會悶，佢就解釋話會帶年輕人落區，準備明年區議會換屆選舉喎！落區打拚出汗又出力，區諾軒搵實習生嚟做，唔通係打「廉價勞工」嘅如意算盤？