政情：樂美美感嘆城市化難見靚蝴蝶
地球嘅生態面貌好似年年都差唔多，但其實不知不覺間已發生深刻變化。東華三院前總理雲維熹同太太樂美美早前出席一個展覽，展品中有唔少標本。樂美美諗起細個時，爸爸好鍾意收集昆蟲標本，每次出門旅行例必搜羅當地昆蟲標本，所以屋企牆壁掛咗唔少七彩斑斕嘅「珍藏」，有啲蝴蝶標本嘅尺寸就好似手掌咁大隻添。
雲維熹話北極熊都餓瘦
樂美美感嘆話，童年視為尋常嘅昆蟲標本，今日已經買少見少。但其實又大又靚嘅蝴蝶，以前香港都好常見，依家城市化之後，已經好難見到，下一代人可能要睇資料及紀錄，先知昆蟲世界係何其多采多姿。
雲維熹都有同感，話現時生態環境正朝向不利物種繁衍嘅方向發展，例如北極熊呢種極地霸王，亦因氣候變異而餓至瘦骨嶙峋，所以話，環境保護，人人有責呀！