中環出更：坑渠上包糉 白鴿區議員被轟唔衞生
端午臨近，又係食糉嘅時節。有讀者向本報投訴，民主黨（白鴿黨）沙田區議員吳錦雄位於大圍顯徑嘅區議員辦事處門外，尋日朝早有大批義工喺坑渠上包糉，衞生情況堪憂。吳錦雄接受查詢時聲稱已及時糾正情況，並對事件造成嘅恐慌向街坊致歉。
材料放地上用腳踩
按讀者提供嘅相片所見，大批街坊直接喺濕漉漉嘅坑渠上包糉，部分包糉材料如糉葉、繩等，更直接放置喺地上。佢哋不時用腳踩相關材料，認真唔衞生。呢啲糉如果派畀街坊食，食壞人點算吖？
吳錦雄接受查詢時解釋，早前獲企業贊助包糉材料，於昨日舉行兩場包糉同樂日，點知街坊反應熱烈，早上有超過五十位街坊到場參加，辦事處未能容納咁多人，有街坊一時心急，故直接喺地上包糉。佢澄清地上嘅包糉材料係棄置嘅，而街坊包嘅糉會自己帶返屋企。為免重複混亂情況，佢已喺辦事處內加設枱櫈，並呼籲大家注意衞生。
卓妮