普普藝術大師安迪華荷講過：「未來，每個人都有十五分鐘成名機會。」大師的確講中咗，之不過呢個成名機會嘅代價隨時好大，好似內地奇女子大鬧香港法庭咁吖，冇錯係一舉成名天下知，但因為貪一時之快犯咗藐視法庭罪，被判坐監之餘仲被追討近二十萬元嘅訟費，都咪話唔係自己攞嚟衰。
咁講喇，明知法庭唔准影相偏要影，擺明視香港法治如無物，受到法律制裁可謂咎由自取。呢件事唔止成為市民茶餘飯後嘅熱門話題，亦無可避免挑起中港矛盾，部分網民仲批評內地人唔文明好愚昧添。不過咁，部分內地旅客有欠文明係不爭嘅事實，但絕對唔等於香港人高人一等囉，講到唔守規矩咯喎，香港人同內地人都係差唔多嘅咋，充其量咪五十步笑百步。
呢，眼下又有一個新鮮滾熱辣嘅例子。尋日有報料網站貼出行山客喺萬宜水庫戲水嘅照片，原來一班大媽大叔無視法例規定，興高采烈跳落水塘游水，有大媽仲張開雙手擺甫士，非常陶醉，仲自行將相片放上網分享添。唔使問阿貴都知，呢啲咁自私嘅行為梗係惹來網民排山倒海嘅負評喇，有人仲將涉事大媽起底，話佢哋係地道香港人，呢鋪真係囉到爆咯。
嗱，根據《水務設施條例》，任何人士進入水務設施浸洗或沖洗，即屬違法，最高可處罰款五萬元及監禁兩年。有指涉事大媽事後向有關網站求饒，承認知法犯法，要求刪相，不過早知今日，何必當初吖，家陣事件傳到街知巷聞，佢哋遲早被檢控都似。你知喇，香港雖然大部分食水靠東江水供應，之但係仍有小部分係靠本港水塘同集水區供應，而且水塘須維持四至六個月食水用量以備不時之需。所以話啫，呢班大媽大叔為咗自己盡興而罔顧公德、漠視法紀、污染食水，萬一出咗事仲可能搞出人命，何止冇品，簡直愚昧喇。
話時話，香港人自私自利都算出晒名咯，淨係睇吓每逢打風落雨，梗有一啲唔識死嘅人唔理勸喻，係都要不顧安危上山下海，然後要勞煩消防員救駕，將自己快樂建築喺公眾利益之上，簡直神憎鬼厭。仲有呀，自從漁護署移走郊野公園嘅垃圾桶後，郊野公園就遍地垃圾，烏煙瘴氣。睇到喇，香港人同內地客其實都係一擔擔，民族劣根性呢樣嘢，唔到你唔信囉。
一句到尾，泥水匠開門，過得自己過得人，法庭內唔准拍照，水塘亦唔可以當泳池咁用。香港人要批評其他人唔文明唔係唔得，但唔該以身作則先，否則自暴其醜，盞貽笑大方嘅咋！