政情：周浩鼎囡囡出世 湊夠好字
立法會議員周浩鼎（Holden）同容海恩都係尋日生日，講開Holden，佢嘅B女四月出咗世喇，連同約四歲嘅兒子，湊夠一個「好」字。Holden話，囝囝剛開始知道有個妹，都有少少呷醋，仲問Holden「會唔會唔理我o架？」好彩朋友醒水幫到手，買禮物嘅時候都會記得要買多份畀囝囝，等囝囝唔會覺得被忽視，近日仲主動幫手攞尿片照顧妹妹添！
咁會唔會生第三個呢？Holden就話順其自然，女兒剛出世，最辛苦都係太太，佢都買咗份禮物送畀太太（口架），依家每晚起身兩、三次照顧女兒。
希望爭取多啲產假
佢又話，太太已經安排產假係前一後九，但初生嬰兒好需要媽媽照顧，前一後九都唔足夠，所以太太額外會攞多幾星期假，Holden最希望爭取到女士可以有多啲產假，因為十個星期真係唔夠呀！