政情：又一山人 回望40年話冇變心態
好多人都會感嘆光陰似箭，不過，著名藝術家兼設計師黃炳培（又一山人）早前出席一個活動時，提到佢最近忙緊籌備後年嘅個人作品展，回顧過去四十年嘅足迹，就笑笑口話冇呢種感覺，形容自己好瀟灑，今日嘅心態同廿歲起步時一樣喎！
設計主題 平衡商業理想
點解會有咁正面嘅思維？又一山人解釋話，時代在變，樣樣嘢都變緊，設計觸覺及表達方式亦會改變，唔同嘅時間有唔同嘅事要做，所以咪可以保持新鮮感囉！近年佢就嘗試做一啲平衡商業及理想嘅項目，例如幫一間連鎖快餐店進行第六代店舖設計，因應近年興起嘅本土意識，佢提出按十八區各自特色為主題，市民一行入店內見到燈箱即感受到唔同嘅區情。
又一山人笑稱，好高興呢個諗法獲得快餐店接受，如果喺廿年前，相信呢種意念被接受嘅機會唔大。又一山人設計嘅《紅白藍》系列深入民心，睇嚟佢真係好有香港情懷喎！