政情：唔敢立會亂嚟 峯鴿區會搞事
民主黨立法會議員兼中西區區議員許智峯（峯鴿）因涉強搶手機搞到一身蟻，不但面對被立法會彈劾，更被警方刑事調查，所以近期喺立法會都做乖乖，唔敢亂咁嚟！不過，峯鴿就回歸區議會搞抗爭，尋日返區議會開會時，就同委員會主席陳財喜爭執，最終會議開咗約半小時就流會收場。據了解，峯鴿咁勞氣係歸咎政府遲交文件睇唔切，所以要求剔除有關議程，但有區議員就寸爆峯鴿話「文件得兩行，要睇實會睇晒」。
同委會主席嘈 結果又流會
中西區議會交通及運輸委員會尋日下午兩時半開會，討論十九項議程，據悉委員會議程「大塞車」，原定只有十項討論議程，而峯鴿就覺得不滿，陳財喜就因應佢要求增加討論項目。不過，峯鴿見到要討論嘅喺域多利道增建巴士站，佢就大鬧政府無按一貫要求，喺十四日前向區議會提交文件，搞到佢睇唔切喎。
政府都承認遲交文件，三日前先交文件，但係為咗想項目快啲上立法會審議，希望趕及今個會期通過。陳財喜最終裁決繼續辯論，峯鴿就繼續表達不滿，兩人疊聲發言引起混亂，陳財喜覺得開唔到會，於是宣布流會。
副主席寸抽水嘥大家時間
有份出席會議嘅中西區區議會副主席陳學鋒就批評，峯鴿浪費時間，事前就晒佢增加議程，開會時又話要剔除一項議程，加巴士站咁簡單，文件內容得兩行，想睇實睇得晒啦！陳認為，如果為咗政治抽水嚟浪費大家時間，又浪費公帑，呼籲選民應該諗吓「呢啲人係唔係仲適合做議員囉！」
峯鴿回覆查詢時話，政府遲提交文件剝削議員提修訂動議嘅權利，強調唔係起一個巴士站咁簡單，係講緊整個前摩星嶺平房區公營房屋發展計劃，真正入文件係兩日半，「點夠時間做修訂？」批評政府極不尊重議會。佢又話，開會後立即要討論「通過會議議程」，佢反對通過兼要求投票，但主席唔肯做，慨嘆反正都係輸（口架）喇，想留個紀錄啫！
峯鴿喺立法會涉強搶手機被建制派圍攻，搞唔出咩花樣，依家返區議會「搞搞震」，唔知咁樣「默默耕耘」對明年區議會換屆選舉係咪有幫助呢？其實主席可以將峯鴿趕出會議廳都得，何必要流會浪費大家時間呢？究竟係因為政府遲交文件理虧在先吖？抑或係建制派想峯鴿孭多個流會罪名呢？