中環出更：丁權大過天 劉業強去英國唔開會
丁權係鄉事派最重視嘅事，而覆核丁權政策嘅案件將於今年十二月開審，對鄉議局嚟講，現時可以話迫在眉睫，鄉議局主席劉業強亦計劃喺本月遠赴英國同御用大律師舉行工作會議。依家立法會大會正審議《廣深港高鐵（一地兩檢）條例草案》，劉業強身兼立法會議員同行政會議成員，一早預告唔開會，甚至可能去唔到投票，真係丁權大過天呀！
同憲法專家見面
事緣係長洲覆核王郭卓堅幾年前入稟覆核丁權政策，成為首宗挑戰丁權嘅案件，受原居民高度重視，案件將於十二月開審。劉業強話，今次英國之行，主要係同憲法專家會面，仲話對方好難約，強調喺英國只會逗留幾日，盡快處理好原居民關注嘅問題後，就會迅速返港去立法會開會。
其實每次談到丁權問題，鄉議局都會指新界原居民合法傳統權益受到《基本法》保障，加上原居民一直認為，最主要嘅傳統權益就係住屋權同殯葬權，所以鄉議局有必要去釐清傳統權益嘅定義。鄉議局亦相當重視，將六月份嘅鄉議局執委會提早舉行以遷就劉業強嘅行程，所以劉業強離港唔開會，都算係情有可原啦。
卓妮