每年維園舉行嘅六四晚會都係支聯會同各民主派政團籌款掠水嘅時機，六四當晚就有多個團體籌款。雖然支聯會多次公開話想籌到多啲資金去為六四紀念館設立永久會址，不過至今仍未成事。雖然係咁，大部分政團都係掩住荷包，扣除籌得款項十分之一畀支聯會作行政開支後，其餘款項都係袋落自己袋。而唔計主辦嘅支聯會，當晚籌得最多款項嘅就依次為香港眾志、社民連同小麗民主教室。

支聯會當晚籌得一百四十八萬元，比上年多咗七萬元，其中五十萬會撥作興建六四紀念館。香港眾志就籌得三十三萬元，係其他政團中最多。社民連就籌得三十二萬元，比去年多十四萬元，佢哋估計係因為大部分成員都官司纏身，所以市民想捐款幫吓佢哋喎。而由被取消立法會議員資格嘅劉小麗成立嘅小麗民主教室，今年就籌得超過十四萬元，比去年增加六萬幾，佢就講明係用來營運教室同出糧畀教室職員嘅。

另外，公民黨、新民主同盟及工黨今年就分別籌十四萬元、約三萬元及二萬五千元。而首次喺六四籌款嘅「長洲覆核王」郭卓堅都籌到約二萬元。