中環出更：波哥唔加議程 否認怕官員等
立法會財務委員會近年受拉布影響，審批工程撥款進度緩慢。財委會主席陳健波（波哥）早前提出，趕喺暑假休會前開快車加會二十四小時。有建制派議員就話，近幾次財委會都提早完會收工，故曾向波哥提出每次開會可以加多啲議程，但係竟畀波哥拒絕，因為擔心萬一審批唔切，令官員白等喎。
暑假休會前都硬仗連場
波哥接受查詢時大呼冤枉，話一向「政府交幾多上嚟就放幾多落議程」，近日財委會議程較少，係因為撥款申請經財委會轄下工務或人事編制兩個小組委員會通過後，需至少兩周先做好會議紀錄同相關議題嘅書面回覆畀議員，故即使兩個小組委員會會議較暢順，撥款申請亦需時間排上財會，所以財會議程只係暫時相對少啲。
不過，波哥就提醒建制派唔好太「心雄」，因為開會一帆風順唔係必然，好似今個星期五嘅財委會，民主派已預告要討論將軍澳跨灣連接路及觀塘市中心重建計劃嘅分層行人連接系統，唔會咁易就表決。而財會仲有多個爭具議嘅項目，包括機場第三條跑道嘅相關工程、元朗十七億行人天橋、觀塘噴水池項目等，所以暑假休會前都硬仗連場咁話。
卓妮