要聞港聞
中環出更:貓眼黑超配膠手袋 麥瑞琼追透視潮流
麥瑞琼戴上新款貓眼黑超,好有型。(徐家浩攝)
尋日喺一個國際新生代設計師巡演活動上,見到享受緊退休生活嘅香港零售管理協會前主席麥瑞琼,佢戴住一副貓眼黑超、配襯斜孭膠袋,加上深入民心嘅超短髮型,成個潮人打扮咁去睇時裝表演。佢笑笑口話潮流興透視,好似膠雨褸、膠水靴同膠手袋咁,所以佢都唔執輸買咗個膠手袋,一於膠埋一份喇!
麥瑞琼笑稱好鍾意睇時裝雜誌,每個月都會追睇,自有一套扮靚心得。佢形容自己身高唔高、塊面又細,市面啲太陽眼鏡又大又重唔啱戴,早前難得見到呢副貓眼黑超夠晒輕盈,鏡片又細,好似為佢度身訂造咁。
活動嘅主辦機構揀選咗內地、香港、冰島、巴拿馬同坦桑尼亞等多位年輕設計師,以一帶一路為元素設計時裝進行巡演,六月起將分別到冰島、巴拿馬、坦桑尼亞及珠海巡演,希望藉此為設計師提供展示創作力嘅平台,促進跨國交流同共融。
香港設計師余嫿、任銘暉都有份獲選參加巡演,余嫿話好期待去冰島,因為從未去過,今次可以寓工作於娛樂喇!
馬偉明:港府埋沒設計人才
任銘暉(左)見到前輩馬偉明(右)即上前打招呼。
華慧娜(左)鍾意着旗袍,陳百里(中)同余嫿(右)都讚佢着得好睇。
到場欣賞巡演時裝騷嘅仲有商務及經濟發展局副局長陳百里、著名設計師馬偉明、香港婦協名譽會長華慧娜等人,問到馬偉明對邊個一帶一路沿線國家嘅服裝印象最深刻,佢竟然話係香港,事關香港有好多人才。佢話鋒一轉,批評港府仍未有一個類似韓國東大門嘅時裝匯集地,畀設計師有一個可以展示設計成果嘅地方,咁樣埋沒咗好多人才喎。
卓妮
第一手消息請下載on.cc東網iPhone/iPad/Android/Windows Phone Apps