政情：高佬賢守漁民禁忌 唔着淺藍色衫
正所謂「各處鄉村各處例」，一唔小心好易犯禁。立法會漁農界議員何俊賢（高佬賢）就試過「開口夾着脷」，本來想話揸車送朋友返屋企，點知順口就講「送你一程」，即刻畀人話唔好亂噏！高佬賢又話，漁民有不同禁忌，就好似唔可以着淺藍色衫落船。吓？唔通驚跌落海會睇唔到？
似「殯儀藍」最多着深藍
高佬賢話跌落海睇唔到係理性判斷，事實係漁民覺得淺藍色似「殯儀藍」，同古代做白事掛白燈籠印藍字好相似，所以佢唔會着淺藍色，最多都係得深藍。
佢仲笑稱，如果同漁民開會，可能唔着衫，搭多條毛巾喺膊頭，就更符合形象。不過，佢都話最重要都係尊重，唔係樣樣禁忌都會識，態度最緊要。