政情:容海恩接葉劉棒 搞外傭議題

唔少家庭都有聘請外傭,而新民黨主席葉劉淑儀喺該黨成立之前,早喺二○○八年加入立法會時,已爭取永久取消外傭稅,數年後終於成功,惠及外傭僱主。新民黨嘅立法會議員容海恩尋日喺立法會大會口頭質詢都提起,每逢假日,各公園、行人天橋通道同行車天橋底等公眾地方,都有大批外傭聚集,影響市民,當局會唔會考慮喺各區增設中心,方便外傭使用喎。唔通容海恩接葉劉棒搞外傭議題?佢仲要嚴打外傭阻街添!

被指阻街擾民 議員倡增設中心

容海恩話外傭假日喺上述地方席地而坐、食嘢同瞓覺,影響市民日常生活、商戶經營同公眾地方嘅環境衞生,問題已持續多年,仲有惡化趨勢,外傭來自唔同嘅地方,但現有嘅海外家庭傭工中心係由菲律賓人負責,質疑政府係咪置其他國籍嘅傭工不理,唔少市民希望有條路行番,批評政府至今仍未增設外傭中心。

社福界議員邵家臻都關注位於堅尼地城嘅外傭中心位置偏僻,只有三百多名會員,但依家外傭已有近三十八萬人,建議政府喺中環、銅鑼灣等多個外傭經常聚集嘅地方增設中心。

勞福局稱可租公共場地辦聚會

根據政府嘅數字,過去三年,康文署就有關外傭喺康文署設施聚集所接獲嘅口頭警告中,包括逾五千宗涉及阻礙公眾地方,近九百宗涉無牌販賣,至於被定罪嘅只有十三宗涉及無牌販賣,而涉罰款通知書嘅就有四十八宗亂拋垃圾同五十九宗吸煙。

既然有咁多問題,點解決?勞工及福利局局長羅致光話過去有外傭喺維園非法煮食,康文署、食環署等多個部門曾到維園派單張,勸喻外傭唔好阻塞道路同煮食,政府並無計劃再增設外傭中心,外傭團體可以租用公共場地舉辦聚會,政府會關注外傭聚集嘅問題。

民政事務局局長劉江華就話堅尼地城嘅外傭中心運作良好,並非只有菲律賓籍會員可以使用,相關協會亦會向六間位於銅鑼灣、九龍塘、北角等地嘅中學借地方,讓外傭聚集,若其他協會能搵到其他地方,亦可以主動申請設外傭中心。

聽到班官咁講,即係冇新措施,一切照舊喇!咁外傭被指阻街嘅情況亦只會持續落去。

第一手消息請下載on.cc東網iPhone/iPad/Android/Windows Phone Apps