開講有話：「前人種樹，後人乘涼。」喺保育大潮下，如果變成前人種樹、後人斬樹咯喎，又好難唔激起爭議嘅，尤其斬樹嗰個係有先斬後奏前科嘅特衰政府，想唔引發官民對立都難喇。
呢，地政總署尋日晨咁早就去咗薄扶林般咸道，話有兩棵樹齡超過八十年嘅細葉榕受到真菌感染，出現樹洞腐爛，斜出馬路，所以要進行斬樹工作喎。有環保團體、學者同立法會議員就到場抗議，話地政總署就兩棵樹所做嘅安全報告粗疏，認為兩棵樹並冇即時倒塌危險，質疑斬樹行動背後嘅依據，於是包圍兩棵樹阻止政府斬樹咁話。民政處、地政總署同樹木辦見勢色唔對，一度離場商量點樣收科。點知到咗下晝，民政事務專員突然帶埋約二十個自稱住喺附近嘅人士到場，話嚟支持斬樹喎，梗係同環保人士發生口角喇，擾攘逾八個鐘，兩棵樹始終難逃被斬嘅命運，真係樹欲靜而爭拗不止咯。
坦白講，港府幾乎鑊鑊斬樹都引發爭議，之前般咸道有四棵逾一百五十年歷史嘅石牆樹，畀路政署漏夜斬咗，隨即引嚟先斬後奏嘅批評，激起大批市民聲討，當時政府信誓旦旦會加強溝通，唔會重複犯錯，結果話口未完又嚟多單翻版，證明根本冇吸取教訓。樹木辦仲被轟斬樹多過救樹，形同虛設，都唔知有乜嘢存在意義。
講真，若果棵樹真係有倒塌危險，冇人會阻止政府移除呢啲巨型殺人武器，問題係地政總署同樹木辦理據不足，份報告只係由一名外判人士填寫，有冇專業資格連地政總署都烏瀡瀡。再講吖，嗰位樹木辦總監最近被踢爆唔係專科出身，早就被質疑為濫竽充數，結果被學者當場問到口啞啞。咁又係呀，港府一向欠缺樹木方面嘅專家，求其搵個外判工人「目測」吓棵樹又收貨，兒戲成咁，有乜辦法唔處處畀人挑機吖？
話時話，樹木辦嘅角色根本就唔知做乜，呢個當年因為有女大學生喺赤柱被大樹壓死而急急成立嘅衙門，話就話負責統籌各部門樹木管理工作，實則係冇牙老虎，廢到連申訴專員公署都忍唔住點名批評。大家有眼見，樹木辦成立以來，不但塌樹老是常出現，好樹仲經常被當病樹辦，家陣仲衰到唔理好醜，一律將樹木早斬早着逃避孭鑊，咁樣亂斬樹法，唔畀環保人士鬧爆至奇喇。
正所謂「一節見則百節知」，呢個政府連保育樹木都搞唔掂，唔係自把自為，就係草菅「樹」命，引發咁多對立同民怨，試問喺其他施政方面，市民仲可以旨意佢哋做得啲乜吖！