政情：植潔鈴同家姐似樣 街坊易認錯
下個月初就係東區區議會佳曉選區補選，自稱係建制唯一人選嘅候選人、民建聯植潔鈴（Elaine）尋日帶埋家姐同細妹一齊現身競選活動，Elaine講起家姐同細妹都已經拍拖嘞，但佢就仲未有拖拍，不時都有啲街坊話要介紹男仔畀佢識，但係佢就話已嫁咗畀社區嘞！
李鳳琼玩「篤波」
Elaine話三姊妹都喺呢區長大，自己同家姐由細到大都似樣，其實睇真啲，一個似媽媽，一個似爸爸，但不時都有街坊見到家姐就以為係見到佢，但家姐有時反應比較慢，人哋打完招呼，要遲幾拍先識笑，至於細妹就細粒啲，所以少啲人會認錯。
泛民嘅候選人李鳳琼尋日亦舉行誓師大會，立法會議員邵家臻、范國威同被取消議員資格嘅劉小麗等都有出席，佢哋手持寫有「真」字嘅氣球，整爛後跌出寫有「建制」嘅字條，又撕爛該字條。李鳳琼話有候選人自稱民主派、民生派，想「篤爆」該人係「真建制」，自己係泛民唯一候選人。
另一名候選人陳真真其後發新聞回應李鳳琼嘅行動，強調自己係以獨立候選人身份參選，認為今次補選只有「真有料」同「假有料」之分，希望李鳳琼能以君子手段進行競選，唔好抹黑其他候選人。