政情：泛民護短 反譴責冚旗 圖淡化「峯搶手機」
民主黨（白鴿黨）立法會議員許智峯（峯鴿）涉強搶保安局女行政主任手機醜聞，除咗正面對警方調查，而立法會已訂定新民黨議員葉劉淑儀（葉劉）將於周三大會上，提出譴責峯鴿動議。至於早前新同盟范國威（Gary）聲稱有意就動議提出反對，據了解，大部分泛民議員都認為「多一事不如少一事」，唔贊成提出反對。換言之，泛民繼續護短，Gary欲提反對勢將難產，令峯鴿暫時逃過指摘，事件直入調查階段，企圖淡化事件。
上月底爆出「峯搶手機」事件，惹來全城鬧爆，之後白鴿黨不停變臉，一時「嚴人律己」，一時又稱「罪不至死」，繼續做「護短工程」。而按一般程序，如無議員就譴責動議提出反對，就唔使進行辯論同表決，可將事件直接交由調查委員會處理，進入調查階段就一切保密至完成調查為止，根據過往經驗調委會都要搞番一年半載先完成報告，即係進入調查後就可以淡化件事，隨時仲可以拖到換屆為止。
有指提反對變相逼民主黨表態
有消息人士透露，自Gary表明有意提反對譴責動議後，唔少泛民議員都唔想再「節外生枝」，普遍共識「一動不如一靜」，讓事件慢慢丟淡。另更有輿論認為如要提反對，變相逼白鴿黨表態，據悉白鴿黨中人都因此有煩惱，連最後調查完後要就譴責動議投票時，到底要避席抑或坐定唔撳掣都未有定論，如果Gary反對譴責動議後，發言就畀人話護短，唔發言就變唔撐黨友，「左右不是人」。據悉，上次民主派會議中，大部分泛民議員已向Gary表明「心迹」，唔贊成提反對，直指策略唔好，隨後議會陣線再開會討論都傾向唔提反對。喺咁嘅形勢下令白鴿黨可鬆一口氣，可以拖耐啲，淡化事件再作處理。
Gary回覆查詢時，重申仲未就事件作出決定，目前正等待數名議員回覆，會喺周三大會前作出最後決定。問及係咪傾向唔提反對，佢承認有可能，因為擔心建制派會爭取更多時間指罵峯鴿。
其實，若Gary仍堅持繼續提反對嘅話，到時泛民就難以收科，兼會成為眾矢之的，但礙於唔想「象徵式」撐峯鴿繼續內耗泛民支持度，睇怕最終佢都要冚旗，大家乖乖地聽葉劉鬧一轉就算數喇！