中環出更：自爆冇色狼埋身 蔣麗芸學西洋拳防搶嘢
官仔骨骨嘅勞工及福利局政治助理馮興禮（Henry），早排同立法會議員蔣麗芸（Ann）拍片「過番兩招」，教大家做運動伸展吓。阿Ann尋日又再上載訪問Henry嘅短片，點知佢自爆話已一把年紀，唔會有色狼「埋身」，到底佢哋傾緊乜嘢呢？
馮興禮話有益身心
經過上次「拳腳過招」一役，阿Ann好奇點解Henry會學西洋拳，Henry就話早喺英國讀書時已經有留意呢項運動，不過就唔敢喺當地亂加入拳館，返嚟香港見「神奇小子」曹星如好紅先決定去學。佢又話學完之後對心肺健康及工作減壓都好有用o架！
阿Ann追問，「咁自衞有無幫助？」Henry笑笑口話，如果咁不幸遇到色狼，都可以防避吓嘅。阿Ann即刻好認真話應該要考慮吓去學，但強調「我唔係要防色狼，一把年紀防咩色狼」，最重要係防搶嘢，「好似搶手機嗰啲」。好明顯阿Ann暗嘲民主黨（白鴿黨）議員許智峯早前搶行政主任手機事件喇，難怪Henry聽到只有尷尬地笑，都唔敢搭嘴嘞！
卓妮