中環出更：幫襯新舖中伏 葉澍堃食膠魚
近日香港出現咗冒牌米，令唔少人都好擔心，好似前經濟發展及勞工局局長葉澍堃早排都中招！但出事嘅唔係飯，而係白飯魚，事緣係佢老婆喺街市買咗白飯魚返嚟煎，煎嘅時候都好哋哋，點知一食落口就咬到一舊膠，搞到佢(舌累)都(舌累)唔切！
尋日喺沙田馬場遇到葉澍堃，佢話老婆當日冇幫襯平時買開嘅舖頭，而係幫襯咗一間新舖，點知就買到假嘢，搞到佢都不禁慨嘆，冒牌米至少都仲係米，品質可能差啲，但可以食落肚，佢嗰啲白飯魚直頭係假嘅，如果吞咗落肚都唔知點算！所以佢話「老字號」始終有信譽有保證。
梁高美懿試唔出冒牌米
馬會大董梁高美懿話自己其實唔係好食得出啲米係唔係冒牌，而就算係食有機食品，佢都唔知有乜嘢分別？不過佢都比較幸運，咁多年嚟都冇食假嘢嘅經歷，事關佢買米或者其他日用品都係喺網上向一啲有良好商譽嘅公司訂購，一來方便，二來減少畀人呃嘅機會，但佢依然擔心會食到次貨甚至假貨，始終出街食嘅話都唔知啲食肆用乜嘢米，認為呢啲情況防不勝防，惟有盡量揀啲有信譽嘅食肆，如去旅行時就多數都幫襯大酒店，如果連大酒店都畀人呃，搞到佢食到假嘢，咁就真係冇計喇！
香港醫療專業人士協會創會會長王賜豪都有經營醬油生意，深明農產品嘅價格、產品數量同品質非常浮動，一切都係由天氣話事，所以聽聞過有人會混入一啲次貨魚目混珠，確保自己嘅生意額。不過佢就從來都唔會咁做，咁多年都係直接向代理商拎貨，減低畀人混入次貨嘅風險，加上佢公司已有幾十年歷史，好多都係長期合作夥伴，對佢哋有信心，就算有時原材料來貨貴咗，都一樣會搵佢哋入貨，等彼此之間可以維持良好關係，雖然會賺少咗錢，但可以確保產品唔會有冒牌貨或劣貨，佢覺得係值得嘅！
卓妮