中環出更：孫大豪教路：床尾掛抽象畫 減壓
香港鐘表業總會（總會）主席孫大豪嘅太太杜苑貞早前喺中環一間畫廊首次舉行個人畫展，舉行開幕儀式時好多城中名人去撐場。孫太畫嘅係抽象畫，孫大豪笑言太太好多作品都喺屋企每個角落做過「巡迴展出」，佢對其中一幅最有感情，事關幅畫掛喺床尾，朝朝起身都見到。佢仲話，抽象畫嘅好處就係唔同時間望住同一幅畫會有唔同嘅感受，有助減壓喎。
孫大豪一家人以前定居新加坡，早幾年先至回流返港。孫太因為經常陪兩個仔到植物公園玩，特別鍾意荷花嘅形態，於是就開始畫荷花，兩年前去咗張家界，被氣勢磅礡嘅山水震撼，進一步畫山水抽象畫。今次開畫展可以話係完成咗人生嘅願望，仲可以趁機做善事，將部分收益捐畀脊髓肌肉萎縮症慈善基金添。
趙世曾孫秉樞現身撐畫展
開幕當日去撐場嘅包括久未露面嘅名人趙世曾。孫大豪嘅爸爸孫秉樞一見到佢，就上前打招呼，原來兩人相識超過半世紀，五十二年前孫秉樞做東華三院主席時，趙世曾都係東華總理。
亞洲金融科技師學會創辦人龐寶林同太太Juliana都有到場。龐寶林唔止炒股、投資叻，間中都會買畫投資，試過喺九十年代初期，用唔使一萬元就買入內地畫家范曾嘅畫作，幾年前已升值至幾百萬元，升值數以百倍計，和味過炒股，難怪佢都話可惜當年冇買多啲喇。
卓妮見香港表廠商會會董周宛賢及總會顧問黃錦成傾得好開心，原來黃錦成嘅愛女黃雅芝四月生咗個BB仔，啱啱滿月，唔怪得個個都恭喜佢啦！
卓妮