政情：張超雄擅提修正案 被轟破壞勞顧會平台
立法會尋日審議有關「復職令」嘅《二○一七年僱傭（修訂）條例草案》。有關草案原訂今年一月恢復二讀，點知議員張超雄提出未經法案委員會討論嘅修正案，又偏離勞顧會共識而遭政府撤回，所以尋日恢復二讀就被勞資雙方狂揪。
多名建制派議員點名批評張超雄嘅做法，認為會破壞勞顧會嘅平台，表明唔會支持，其中勞工界議員陸頌雄就鬧得最狠。佢直斥張超雄未有喺法案委員會上提出修正案及討論，無畀深入討論嘅機會。至於現時方案係經勞資談判而得出結果，張超雄嘅修正案獲得通過將會打破勞顧會信任，直言勞顧會作為勞資雙方最高層次嘅協商平台，係唔能夠隨便打破慣例。
陸頌雄就重申，政府方案雖然唔係十全十美，但如果破壞有效嘅溝通平台，將來爭取勞工權益就變得困難，係「贏咗粒糖，輸咗間廠」，而紡織及製衣界議員鍾國斌都話，直情拎陸頌雄份講稿講就得，就連勞工及福利局局長羅致光都話若果張超雄嘅修正案獲得通過，唔排除會撤回草案。