政情：羅冠聰女友「退黨保平安」
香港眾志尋日公布領導層換屆，原本以情侶檔擔任正、副主席嘅立法會前議員羅冠聰同袁嘉蔚，前者退居常委，後者更宣布退黨，令人懷疑袁嘉蔚係為出戰明年區議會選舉鋪路。
眾志喺聲明中指，收到袁嘉蔚退出嘅通知，衷心感謝對方嘅貢獻，又祝佢「在退出眾志之後一切順利」，惹來政圈遐想。皆因早前以眾志常委參選立法會港島區補選嘅周庭，最後被DQ（取消資格），而佢亦冇留喺新一屆常委。考慮到區議會選舉勢引入確認書制度，按周庭一例，眾志成員參選亦好大機會被DQ，盛傳有意出戰區選嘅袁嘉蔚依家離開眾志，大有「退黨保平安」，為明年參選鋪路嘅意味。袁嘉蔚就話了解到眾志未來嘅工作重心將有所調整，理念上亦同佢嘅工作範疇不盡相同，佢決定以更獨立嘅身份繼續社區工作。
至於黃之鋒就繼續出任秘書長，接替羅冠聰做新主席嘅係有反東北案在身嘅林朗彥，而副秘書長一職則由前常委陳珏軒出任，袁嘉蔚原先嘅副主席一職則取消。
周庭拍水着宣傳片用2.3萬元
另周庭早前參加立法會港島區補選，雖被DQ，其中佢嘅泳裝宣傳片就非常吸引眼球。根據選舉申報，佢共花咗十七萬三千元，當中買咗七萬港元Package拍三條片，第一條就係泳裝盛惠二萬三千元。