政情：籌46萬 黨友捐近半 范國威真係冇朋友？
經新界東補選重返立法會嘅新同盟范國威（Gary），作為有經驗嘅候選人，佢早已經計好要使幾多錢參選，所以公開籌款六十五萬元做選舉經費。但根據開支申報，Gary最後只有約四十六萬九千元捐贈，包括新同盟捐二十萬港元現金同一名黨友捐二千元現金。
宣傳品已用近85萬元
七除八扣下，甚少外來資金，唔通Gary真係冇乜朋友？不過據了解，今次係Gary首次籌款，對於黨內而言可謂破晒紀錄喇！
Gary嘅總開支約為一百五十四萬元，按佢獲得約十八萬票計，每票值八元三角。佢花最多錢喺宣傳品，使咗八十四萬九千元，另外佢又請晒黨員幫手助選，人人都有些少津貼，共花二十一萬六千元。
另外，新東候選人性傾向條例關注組成員趙佩玉都使咗五萬九千元，主要用嚟印卡片同宣傳品，最慳就係搵老公陳仁傑做佢選舉代理人，咁就一蚊都唔使畀嘞！佢亦都有七位老友掏荷包捐現金，共五萬七千元，計番條數佢都只係要畀約二千元參選啫！至於參加民主派初選嘅工黨主席郭永健就使咗約三十萬元，幸好捐款都有差不多款額，幾乎做到收支平衡。