政情：政府社福界0.5平方米之爭 增院舍空間拖拖拖
香港準備迎來高齡海嘯，各界都關心安老政策檢討。因應近年安老院舍質素為人詬病，社會福利署由舊年開始，檢討推出廿三年嘅《安老院條例》，其中就院舍「人均面積」各持份者叫價唔同，最新暗盤價為社福界要求要十平方米，政府堅持九點五平方米！據了解，呢個「○點五平方米之爭」，煞停政府本周五拍板嘅機會，要再約見各方進行斡旋，隨時又要拖番一年半載都未搞掂。
《安老院條例》喺九四年人口老化潮之初開始制訂，至九六年全面實行，迄今都未有進行相關檢討或修改。呢個範疇係屬於勞工及福利局嘅，而社署喺舊年就成立「檢視院舍實務守則及法例工作小組」，成員包括社福界立法會議員邵家臻、私營院舍代表、服務使用者或照顧者等，合共廿六人。
政府同私院未「拆掂數」
現行法例下，院舍人均面積規定係六點五平方米，據了解，小組會議曾經投票，八平方米同九點五平方米嘅方案係獲得最多人支持。而邵家臻就聯同多個社福團體公開叫價，要讓長者有尊嚴地養老過活，大推「八加八」方案，即是房間面積要有八平方米，公共空間活動一樣八平方米，總數達十六平方米。
私營院舍就企硬七點五平方米，而政府暗盤係緊貼目前甲一宿位嘅九點五平方米。邵家臻就批評，依家啲院舍都有八平方米喇，咁邊有改善到質素，建議設過渡期，由新院舍慢慢做，如果堅持九點五平方米係肯定唔會收貨。有知情人士透露，既然政府畀得九點五平方米，好好睇睇，上到十平方米，社福界都可以「收住貨」先。
工作小組經過近一年商討，政府預計會喺本周五會議上正式落實改革，將人均面積增至九點五平方米。據悉，至今個月初政府仲未同私院代表「拆掂數」，所以到今個星期先確定嚟緊會議唔會拍板，再次約各方私下會面「講數」。
勞福局憂要求得寸進尺
咁係咪勞福局局長羅致光企硬唔肯讓步？消息指，勞福局都唔係想出「拖字訣」，○點五平方米都唔讓步，只係怕退得一次，社福界愈叫愈高無法抗拒，要劃線止蝕。消息人士仲話依家護理人員又唔夠，地又唔夠，人就不斷老化，當局都係驚私院搞唔掂，最終市民受苦咋。一貫討價都係「開天索價落地還錢」，不過各有各叫達唔到共識，隨時拖垮檢討冇人獲利就真係嗚呼哀哉囉！