中環出更：勞資權益都爭取 區諾軒自嘲「精神分裂」
立法會飲食界議員張宇人尋日「亂入」立法會人力事務委員會，就強積金問題代商界發聲。立法會議員區諾軒自爆，佢都想加入有關委員會，事關佢未來有兩大任務，包括取消強積金對沖同埋最低工資檢討。佢仲話喺取消強積金對沖上，自己企喺打工仔女角度就支持泛民工會嘅「基金池方案」，但屋企做服裝零售商生意嘅佢亦都關注資方權益，又批評政府喺補貼僱主方面，對中小企有欠公平。勞資權益佢都想爭取，難怪區諾軒都自嘲「精神分裂」。
質疑政府偏幫大企業
政府之前向立法會遞交取消對沖嘅初步構思，以劃線制取消對沖，提供兩重補貼畀僱主。區諾軒話政府現時嘅方案會斷開打工仔年資，計算遣散費或長期服務金時，打工仔會蝕底，而職工盟基金池方案建議成立基金，並注資二百億元，就可以解決有關問題。至於資方方面，佢都質疑政府現時方案對大企業較為有利，認為政府如要資助企業，冇理由唔係中小企行先。
被問到勞資雙方權益佢都爭取，會唔會分身不暇，佢就話明白有時魚與熊掌係未必可以兼得，但佢都只係想改善現有方案喎。最後會唔會兩頭唔到岸，就要睇過先知喇！
卓妮