中環出更：青鹽療效廣徐珊雯孭幾斤返港
南美洲玻利維亞有個一生人必遊嘅高原鹽沼「天空之鏡」，內地都有一個中國版「天空之鏡」，即位於海拔三千幾公尺嘅青海茶卡鹽湖。香港鐘表業總會前副主席徐珊雯（Elise）早前就同一班好友齊齊去青海、寧夏玩足八日，期間都去咗一趟茶卡鹽湖，大開眼界。Elise聽講當地出產嘅青鹽具藥用價值，可以外敷消除肩膊疲勞，如獲至寶，即孭咗幾斤返港添！
Elise話今次行程都幾趕，日日五、六點鐘就起身，其中有一朝就係趕路去茶卡鹽湖。當地除咗有天地一線嘅靚景之外，湖邊仲有鐵路支線連接青藏鐵路，見到咁靚嘅景色，幾辛苦都值得。茶卡鹽湖係柴達木盆地有名嘅天然結晶鹽湖，所產湖鹽被叫作「青鹽」，佢話青鹽有瀉熱、涼血同明目等功效，用微波爐叮熱後外敷可紓緩痠痛，所以就買咗好多當手信。
余壽寧話外遊必帶航拍機
今次同行團友仲有香港化粧品同業協會永遠名譽會長余壽寧（Homer）同香港福建社團聯會永遠名譽會長楊孫西嘅大女、九龍東區各界聯會常務副主席楊莉珊等人。Homer隨身帶住航拍機，去到邊玩到邊，原來佢係發燒友，無論去世界各地公幹或旅行都會帶住航拍機喎。
Homer笑稱自細就鍾意玩遙控飛機，屋企乜嘢尺寸嘅遙控飛機都齊晒，依家就玩埋航拍機，因為可以睇到更廣闊嘅靚景。雖然係老手，但Homer都試過玩到「甩轆」，有次喺馬來西亞玩航拍，當地高樓大廈林立，佢一時記錯咗轉左定轉右，結果搵唔番部機，損失咗幾千蚊。
卓妮